Лидерот на ВМРО-ДПМНЕ, Никола Груевски не одговори на новинарските прашања дали ќе остане лидер на партијата или ќе се повлече од функцијата.
„Ве молам да ме оставите да ја следиме претставата“, рече Груевски.
Претходно, тој изјави дека нема намера да се повлече од јавните настапи бидејќи проектите на чии отварања тој секојдневно присуствува биле заслуга на ВМРО-ДПМНЕ.
Груевски неколку часа претходно, изврши увид во градежните работи на патот за Сончев Град во Сопиште, а потоа беше во обиколка на зградата на Офицерскиот дом и оттаму испрати порака дека чувствува одговорност и натаму ќе „остварува проекти“ како лидер на партијата.
„Јас сум тој кој ги дава ветувања, кој застанува зад таа програма и го става потписот на таа програма. Јас сум тој кој оди по митинзи и на средби со граѓаните им ветува проект по проект, со рокови кога нешто ќе биде завршено и природно за секој одговорен човек јас да бидам тој кој ќе се грижи секој проект да се заврши навреме и така како што сме го ветиле пред граѓаните. Јас имам одговорност и оние кои сакаат да ги декрадираат нашите активности и да ја свртат темата за тоа зошто се појавувам, нема да им ја направам таа услуга и ќе продолжам сите оние проекти кои сме ги ветиле на граѓаните да ги следиме за да се завршат навреме и со квалитетот кој бил предвиден. Не случајно ВМРО-ДПМНЕ 11 години на десет избори постојано ја добива довербата, затоа што внимава што ветува и уште повеќе внимава тоа што го ветува да се реализира навреме, ако може некогаш и побрзо“, рече Груевски.