Брекситот ќе ја примора Велика Британија да излезе од Европската унија. А Шкотска ја турка кон влез.
Британскиот премиер Дејвид Камерон неделава за последен пат седна на маса со 27 колеги европски лидери. Истовремено Никола Стурџен, шкотската прва министерка, беше во Брисел. И за прв пат бараше место на лидерската маса.
“Шкотска јасно гласаше за останување во ЕУ и јас ветувам дека гласот на Шкотска ќе биде слушнат”, изјави таа.
Во 2014 година Шкотска организираше референдум за отцепување од Велика Британија. За време на тој референдум, британскиот премиер упорно им повторуваше на Шкотлаѓаните дека е подобро да останат заедно во заедничката Велика Британија. Резулатот покажа дека успеал да ги убеди. Но брегзит подели нови карти. И јасно покажа дека 62 отсто Шкотлаѓани не сакаат да излезат од Европската унија.
Шкотската фирст министерка во Брисел неделава се сретна со првите луѓе на Европскиот парламент, на Европската комисија и редица европски политичари. Но, Полјакот Доналд Туск, претседател на Европскиот совет, одби да се сретне со неа. Тој смета дека во оваа политичка бура не е добро време за средба шкотски политичар.
Туск со задоволство ќе се сретнеше со Стурџн но му било дошепнато дека тоа би налутило некои земји членки. Како Шпанскиот премиер кој најавил дека ќе одбие било какви преговори со Шкотска. Мариано Рајох стравува дека тоа може да им даде свежи идеи на Каталонците кои сонуваат да се отцепат од Шпанија.
Сепак, шкотската премиерка со голема насмевка изјави дека во Брисел и биле отворени многу порти. Таа забежала драстична промена во европското однесување кон неа. Во 2014 година приемот бил студен. А сега наишла на срдечност.
Разбирливо. Европските институции не кријат дека шкотската независност, по брегзитот, би била вистински спас за да може Европската унија да остане со 28 земји членки. И Шкотска да им покаже на евроскептиците дека излезот од Унијата не е добро сценарио.
Некои европски правници веќе го разгледуваат шкотското досие и бараат начин да ја задржат Шкотска за земја членка. Според нив начинот е нов референдум за независност кој би се случил во наредните две години пред британскиот егзит од Унијата. Ако изгласа отцепување од Велика Британија, Шкотска би можела да го преземе британското место без да преговара ново членство како земја кандидат.
Европската унија бара начин да преживее. Не сака да ја дели судбината на Велика Британија која без Шкотска повеќе нема да биде цела.