Кина денеска ја заврши изградбата и на втората болница во Вухан за изолација и лекување на пациенти од коронавирусот од кој досега починаа повеќе од 560 луѓе. Наскоро се очекува да почне тестирање на новиот антивирусен лек врз првата група пациенти.
Луѓето со полесни симптоми се префрлени во импровизирани болници во спортски центри, изложбени сали и други јавни простори. Здравствениот систем во градот Вухан, каде првпат беше откриена епидемијата во декември минатата година, е „окупиран“ од илјадници заболени.
Новата болница со 1.500 кревети, специјално изградена за пациенти кои се заразени со коронавирус, е отворена неколку дена, откако првата болница со 1.000 кревети со монтажни одделенија и простории за карантин почна да прима пациенти.
Вухан има уште 132 места за карантин со повеќе од 12.500 кревети. Кинеските здравствени власти пријавија 563 смртни случаи и 28.018 заразени лица.