На онлајн брифингот за повеќе од 100 светски медиуми, министерот за надворешни работи на Украина, Дмитро Кулеба, ја истакна итната потреба на Украина за што е можно повеќе проектили од типот Патриот, како и слични системи за противвоздушна одбрана, бидејќи земјата се соочува со интензивни воздушни напади од рускиот агресор. На пресот, министерот Кулеба одговори на повеќе прашања, меѓу кои првите две прашања дојдоа од медиумската платформа на ЦИВИЛ.
ЦИВИЛ МЕДИА: Министре Кулеба, бележиме последователни бранови на руската пропаганда и наративи насочени кон западните земји, со намера да се дискредитираат и попречат нивните напори за давање помош на Украина. Колку е ефикасна нивната кампања и на кои мерки треба владините и невладините актери да им дадат приоритет во борбата против руската пропаганда? Во тој контекст, како би ја оцениле улогата на Северна Македонија во напорите за поддршка на борбата за слобода на Украина?
ДМИТРО КУЛЕБА: Во поширока смисла, руската пропаганда не е толку успешна како што се преправа дека е, бидејќи гледаме дека пакетите за помош продолжуваат да се усвојуваат. Анкетите ширум светот покажуваат дека луѓето ја поддржуваат Украина. Западните влади продолжуваат да се залагаат за поддршка на Украина.
Но ќе забележиме скок во напорите на руската пропаганда во наредните недели и месеци во пресрет на европските избори и изборите во САД, така што ќе има сè повеќе и повеќе руска пропаганда.
Русија нема да штеди напори да ја обвини Украина за каков било вид на криминал во обид да ја дискредитира, да ја намали поддршката што Украина ја ужива. Токму затоа мора да останеме внимателни, мора да се спротивставиме. Најсвеж пример е обидот на Русија да ја обвини Украина дека е вмешана во пукањето во концертната сала во Крокус во Русија. Овие изјави се лажни и апсурдни.
Украина не функционира така, не се бориме на таков начин. Грозоморните злосторства врз цивилите се руска практика, како што видовме во последните две години од руската агресија врз Украина. Да, ќе се обидат да ја оцрнат Украина, да ја дискредитираат Украина. Русија буквално нема црвени линии кога станува збор за нивните обиди да ја дискредитираат Украина во очите на целиот свет.
Мислам дека проблемот е помалку во руската пропаганда која не познава црвени линии, туку е повеќе во западните влади кои повлекуваат премногу црвени линии кога станува збор за поддршката на Украина во нејзината борба против руската агресија. „Топката“ во оваа смисла не е на руска страна.
Мора да бидеме будни, мора да се спротивставиме на руската пропаганда. За жал, не можете да ја победите руската пропаганда користејќи алатки за слободата на медиумите и слободата на изразување. Мораме да бидеме строги кон руските новинари, строги кон руската пропаганда, затоа што ако им дозволите да дејствуваат во вашата земја, несомнено е дека ќе сеат поделби и ќе вложат максимални напори да ја дестабилизираат вашата земја.
Кога станува збор за Северна Македонија, се разбира дека вашата земја е добар пријател и сте направиле многу во последните две години, во споредба со вашите можности. Навистина направивте многу за да ни помогнете, исто како што и ние што ви помогнавме во 90-тите. Ви благодарам.
М. Пешевска