Неколку стотина илјади луѓе излегоа на улиците на Шпанија, барајќи единство во земјата. Според информација на организаторите, околу 950.000 луѓе присуствувале на митингот за единство. Митингот се одвива под слоганот „Доста е! Да му се вратиме на здравиот разум!“
Како организатор, беше именувано здружението „Каталонско граѓанско општество“. Меѓу учесниците во демонстрацијата се и претставници на различни политички партии во Шпанија. Претходно, шпанскиот премиер Маријано Рахој рече дека каталонскиот проблем влијае на интересите на Европа како целина. На 1 октомври, во Каталонија се одржа референдум, на кој околу 90% од учесниците гласаа за независност на таа област од Шпанија.
Шпанскиот премиер Маријано Рахој рече дека неговата влада нема да дозволи Каталонија да прогласи независност и да се одвои од остатокот на земјата. Рахој во интервјуто за Паис изјави дека Шпанија нема да се дели и дека единството на шпанскиот народ ќе биде зачувано.
„Мадридската влада ќе ги разгледа сите достапни правни лекови за да ја спречи Каталонија да прогласи независност“, истакна премиерот.
Рахој додаде дека Мадрид може да се повика на членот 155 од Уставот кој и дозволува на владата целосно или делумно да ја суспендира регионалната самоуправа која не ги почитува уставните обврски или ги загрозува интересите на Шпанија.
Каталонскиот претседател Карлес Пучдемон, пак, соопшти дека шпанскиот регион ќе прогласи независност по минатонеделниот референдум, кој шпанската централна влада не го признава и кој шпанскиот Уставен суд го прогласи за незаконски.
Каталонските власти ги објавија конечните резултати од референдумот, според кој 90,18 отсто од гласачите прогласија независност, но излезноста беше само 43,03 отсто.