Голем број на полициски возила со вклучени ротациони светла вечерва беа декор на големиот паркинг пред СЦ „Борис Трајковски“. Настанот ги вознемири жителите од околните куќи и згради во штотуку започнатиот „полициски час“ кои помислија дека станува за голема полициска акција, но причината е сосема поинаква.
Но, набрзо стигнаа смирувачки тонови од Министерството за внатрешни работи (МВР) дека полициското присуство кај Националната арена „Борис Трајковски“ е всушност за снимање на промотивен видео спот за Денот на полицијата – 7 мај.
„Станува збор за снимање на спот за Денот на полицијата“, велат извори од МВР кои потврдија дека и техничкиот министер присуствувал на настанот на кој воедно се практицира и вежба за патрониот празник на полицијата.
Набрзо потоа се огласи и лично Чулев кој преку својот Фејсбујк профил објасни за што точно станува збор.
„Вечерва кај СЦ „Борис Трајковски“ се снимаше кратко видео по повод Денот на полицијата, а со кое Министерството за внатрешни работи ќе се заблагодари за придонесот на полициските службеници, здравствените работници, припадницитен на Армијата и на сите други во справување со коронавирусот. Не станува збор за никаква злоупотреба на полициските сили, туку за еден мал гест со кој ќе се заблагодариме за нивната секојдневна жртва, ќе се валоризира нивната посветеност во заштита на здравјето на граѓаните, а истовремено ќе се подигне нивниот морал. Потенцирам дека со денешните активности во ниту еден момент не се нарушени тековните обврски на Министерството за внатрешни работи“, напиша Чулев на Фејсбук.