По речиси 5 часа расправа со долги монолози и неколку паузи во Комисијата за политички систем и односи меѓу заедниците, специјалната обвинителка Катица Јанева демонстративно ја напушти седницата и порача дека тоа што се случува со пратеничките прашања е класичен мобинг.
-Ова веќе е класичен мобинг, јас повеќе не си доаѓам, ќе се појавам само на пленарна седница, рече обвинителката Јанева.
Реакцијата на шефицата на СЈО следува откако пратеничката Владанка Авировиќ во маратонски говор од речиси два часа, постојано бараше Јанева да одговори за нејзината стручност, детали за финансиите и ангажирањето на експертите.
-Политичарите не веруваат во овие договори што се направени на брзина, па од тие договори произлегуваат закони од кои се формира еве и СЈО, кое требаше да ја оправда нашата волја да го формираме за да може да ги примиме ударите од вас. Тоа не се стручни удари од ваша страна како јавен обвинител коj што треба да се дистанцира од политиката, не го признавате легитимитетот на ова Собрание, и рече Авировиќ на Јанева.
– Јас не сум Супермен, ја сум човек, а извештајот е слика за работата на СЈО. Истражувањата утврдија дека досега дека во изминативе 10 години ниту еден обвинител не го образложувал вака Извештајот, а во последните пет години никој не поднел. Драго ми е што некои институции конечно се разбудија од кома како Врховен суд, Судскиот Совет и Јавнообвинителскиот совет. Да се испита работата на овие институции и сакам да порачам, сите институции кои ја омаловажуваат работата на СЈО, во име на Уставот и законите ќе се избориме со сите опструкции и ќе се потрудиме правосудната фела да се врати во судниците и ќе почне да владее правото, рече Јанева.
Авировиќ праша дали потребата од советници е поради нестручноста на СЈО, а најде забелешка и за тоа што СЈО го употребува терминот мисија во своето работење.
Јанева одговори дека ниту еден експерт не сакал паричен надоместок.
– Правните експерти се ангажирани согласно член 15 од Законот за СЈО и ништо не е спротивно на овој закон или на другите закони. Ве информирам за ваше познавање, дека луѓето кои се ангжирани, ниту еден од нив не сака паричен надоместок напротив, јас инсистирам на тоа. Прво, за начело на доверливост, затоа што работат со доверливи материјали, а понатаму сметам дека секој треба да биде платен за својот труд.
Претходно пратениците на ДУИ, ДПА и СДСМ го обвинија претседателот на Комисијата Влатко Ѓорчев за нестручно раководење и побараа тој да се повлече.
-Преку 30 процедурални забелешки во текот на три дена работа, дефинитивно барем треба да се размислите. Овде работата по две сериозни точки кој што треб да се разгледуваат и на пленарна сњедница, директно вие сте виновен за лакрдеијата на оваа седница. Се обидував да ви укажам за начинот кој ја водите оваа седница. Јас ви ги разбирам мотивите, вашиот личен порив, ближат избори, веројатно се борите за место на листата, затоа што очигледно е дека надевор од политиката тешко и за леб дека ќе заработите. Јас не сум во клупите за да ги слушам вашите беседеи и говори, му порача Шилегов на Ѓорчев.
Ѓорчев, во петокот седницата ја заврши со монолог дека вмровската компонента е од 800 000 гласови во Македонија и не се губи, како и тоа дека СДСМ , ДУИ и ДПА коалицираат со Специјалното обвинителство за да се испорача двојазичност. Денеска повтори дека не отстапува од своите ставови.
Ѓорчев откако констатираше дека Јанева ја нап0уштила седницата, ја одложи расправата за утре, иако од СЈО и преку соопштение потврдија дека обвинителката нема уште еднаш да се појави на комисиска расправа.
Седницата е одложена за утре. Освен Извештајот на Јанева, точка за расправа е и Извештајот на државниот јавен обвинител Марко Зврлевски, кој никако да дојде на ред. Зврлевски и денеска беше присутен во Собрание и расправата ја следеше молчешкум.