Министерот за финансии, Кирил Миноски одби да го коментира недомаќинското работење на неговите колеги од Министерството за образование – Абдулаќим Адеми и Спиро Ристовски, за кои во Ревизорски извештај беше обелоденето дека трошеле без мерка.
На денешната прес конференција каде што Миноски и вицепремиерот Владимир Пешевски образложуваа дека според „Дуинг бизнис“, Македонија е помеѓу десетте најдобри економии за водење бизнис во светот, НОВА побара реакција од Миноски за трошоците на Министерството што наиде на зачудување зошто истото прашање се поставува на “тематска“ прес-конференција.
– Во моментов разговараме за извештајот „Дуинг бизнис“ на Светска банка со кој што се истакнуваат резултатите кои што се постигнати од Владата на Република Македонија во насока на креирање на подобро деловно опкружување кое треба да обезбеди подинамичен развој и раст на приватниот сектор. Тоа е мојот одговор, рече Миноски.
НОВА дојде до сите патни налози, фискални сметки и гезмиња на државна сметка, платени од службените картички на Абдулаќим Адеми и Спиро Ристовски од 1 јануари 2015 до 31 мај 2016 година. Во утрешната емисија ЈАВНО на НОВА која ќе ја објавиме во 20 часот, гледајте со каква леснотија на сметка на граѓаните на Македонија се нарачувал телешки бифтек од 5.200 денари, се пиело виски и се спиело во ексклузивни хотели.
На отчет на граѓаните ќе им бидат дадени сите сметки од ексклузивните ресторани и хотели кои ги поседува НОВА и кои се направени со пари од нивните џебови.