Екипата на НОВАТВ денеска беше нападната од непознато лице додека снимаше на локација кај ТЦ Бисер во скопската населба Аердором каде се собираат потписи против наводната изградба на мигрантски кампови.
На снимката се гледа лице на околу 30 години во зелена маичка, како прво ја нападна нашата новинарка Сашка Цветковска додека снима со мобилен телефон, ја турна и и` ја свитка раката и бара да престане со снимањето. Откако дојде и снимателот на НОВАТВ, Трајче Антоновски, кој снимаше во тоа време на друга локација, истиот човек, прво разговара со девојката, која во изјава за НОВАТВ вели дека е дел од организацијата задолжена за настанот, дека е од општина Аеродром и член на ВМРО ДПМНЕ, по што на страна двајцата разговараат со напаѓачот.
Кога напаѓачот слушна дека е повикана полиција, се обиде да избега и новинарката и снимателот тргнаа по него по што тој овој пат ја удри камерата и таа престана да работи и снима. Овој втор напад се случи во ТЦ Бисер, по што напаѓачот избега. На инцидентот има многу сведоци.
Екипата на НОВАТВ случајот го пријави во полиција која направи записник и треба да го идентификува напаѓачот.
НОВА ТВ дојде до информација дека настанот за собирање на потписи против мигрантските кампови е во организација на ВМРО- ДПМНЕ, од каде од општинскиот комитет им биле праќани пораки на жителите во Аеродром да излезат и да се потпишат.
НОВА ТВ се обиде да добие информација за бројот на мобилниот телефон од кој се испраќани пораките за масовност на настанот, но тој е заштитен во службата 1188 и за сопственикот не смее да се откриваат информации. Кога стапивме во контакт со лицето, станува збор за женска особа, не сакаше да се претстави и рече дека телефонот е приватен и дека не е од партија.