Во време кога градоначалникот на Град Скопје, Коце Трајановски се фалеше дека со акцијата Денот на дрвото во скопските урбани општини ќе бидат засадени 256 илјади дрвја, Општина Центар преку соопштение информираше дека им биле доделени само 120 садници.
Градоначалникот на Општината Центар, Андреј Жерновски на „Фејсбук“ објави документи од кои се гледа дека во Ценатр добиле само 120 садници.
Жерновски вели дека владата преку оваа акција ги казнува жителите на Центар.
„Државата, преку „Македонски шуми“, има различен аршин спрема единиците на локална самоуправа, па своеволно одлучува која општина колку садници ќе добие за зазеленување на просторот. Верувале или не, оваа година Општина Центар добива само 120 садници. За Ѓорче Петров 85.293, а за општина Центар, во која власта и град Скопје направија најбрутална сеча на дрвјата, „цели“ 120 садници. Значи 710 пати повеќе садници се пратени за садење во Ѓорче Петров, отколку во Центар“, вели Жерновски.
Тој вели дека жителите на Центар имаат еднакво право на чист воздух. Дури и во предизборен период, кога власта сака да „ќари“ поени на секој можен начин, сите граѓани имаат исти права.
Градоначалникот на Скопје, Коце Трајановски на денешното садење во општина Аеродром се пофали со успешноста на денешната акција и рече дека во Скопје ќе бидат засадени 256 илјади дрвца, а секоја општина ќе добие по неколку илјади.
Не се знае, дали во време на прес конференцијата, Трајановски бил запознаен со одлуката на општината Центар да и се доделат само 120 дрвца.