Претседателот на Кривичниот суд, Владимир Панчевски и неговото семејство, самоиницијативно денеска рушат дел од објектот во близина на градскиот плоштад во Скопје, за кој општина Центар предупредуваше дека е дивоградба.
Панчевски веќе се пожали на одлуката на Центар, но и покрај тоа што Второстепената комисија се уште нема одлучено по неговата жалба, претседателот на Кривичниот суд решил на своја иницијатива да руши.
– Се работи за самоиницијативна одлука на инвеститорите да го вратат објектот во првобитната состојба, изјави денеска пред новинарите адвокатот на семејството Панчевски, без притоа да одговори зошто се одлучиле за рушење пред да видат дали ќе им се прифати жалбата.
Раководителот на Секторот за инспекциски работи, Кочо Стојчески, кој беше на лице место на рушењето, вели, денешното постапување на Панчевски е доказ дека самиот знаел дека се работи за дивоградба на два нелегални ката, бидејќи семејството за овој објект има одобрение само за реконструкција и санација на фасадата на Никола Вапцаров бр. 6.
Рушењето во објектот доаѓа откако Општина Центар најави дека потпишува договор со фирма која треба да постапи по барањата на градежните инспектори.
Неодамна за инспекторката која донесе решение за рушење на два ката од спорниот објект на Владимир Панчевски, скопското обвинителство побара од судот да и се забрани да постапува по предметот.
Таа има доставено исказ пред надлежните, а одбраната по предлогот од обвинителството побара изземање на сите судии од скопскиот Кривичен суд по овој предмет, бидејќи предметот се однесува токму на претседателот на судот, Владимир Панчевски.
Адвокатот на инспектората, Филип Медарски рече дека е зачуден за тоа што таа се товари за злоупотреба на службена положба и овластување поради наводно непочитување на постапката за достава на документи.