Потпретседателот на СДСМ, Коста Петров на прес-конференција укажа на можностите што Договорот од Преспа ги нуди и ги отвора за младите луѓе. Државата, рече тој, тргна по тој пат од кој нема враќање назад оти „на младите во нашата земја им е здосадено од неизвесност и политичари без јасна визија“.
„Вие младите сте најголеми поддржувачи на европската интеграција. Многу добро знаете во кој правец треба да се движи нашата земја. Сакате европска иднина дома, сакате и заслужувате стабилност и нема да дозволите враќање во минатото. Политичарите мора да го слушнат вашиот глас и сите заедно да работиме на подобра сегашност, но и посветла иднина“, рече Петров.
Тој се осврна и на, како што го оцени, разочарувачкиот став на лидерот на ВМРО-ДПМНЕ, Христијан Мицкоски околу Договорот од Преспа и враќање на земјата во време што беше неизвесно што би ги направило неизвесни и иднината и просперитетот на младите.
„Тие продолжуваат да ги игнорираат пораките на сите стратешки партнери дека Договорот од Преспа го откочи патот за Северна Македонија кон НАТО и го продолжи патот кон ЕУ. Тие го игнорираат и фактот дека токму Договорот од Преспа нè придвижи напред од позицијата на 11 годишна стагнација и неизвесност во која западнавме кога ВМРО-ДПМНЕ беше на власт. Договорот од Преспа не е само решение на децениски проблем туку и за наше членство во НАТО“, потенцира потпретседателот на СДСМ.
Таквата порака ја образложи со повисок економски раст, повеќе инвестиции, подобро платени работни места, нови можности и перспективи за младите и најважно, што нагласи Петров, заштитен македонски идентитет.