Хрватското Министерство за трговија, туризам и инфраструктура соопшти дека на местото каде што потона туристичкиот брод кај Сплит сега има нуркачи, кои треба да го спречат истекувањето на горивото од резервоарот на бродот, што може сериозно да го загади Јадранското Море.
„Според информациите со кои располагаме во рамки на истрагата за причините за оваа поморска несреќа, која ја спроведува Капетанијата на пристаништата во Сплит, во тек се координирани спасувачки активности за туристичкиот брод „Sea Villa“ долг 21,6 метри. Овој пловен објект е во сопственост на правно лице од Република Хрватска, а утринава по два часот удрил во крајбрежниот ѕид на бензинската пумпа ИНА на сплитското западно крајбрежје“, се вели во соопштението на Министерството.
На местото на несреќата биле ангажирани и припадници на Сплитската јавна противпожарна бригада, чија поморска единица поставила брани околу оштетениот брод, со цел да се спречи загадување на морето и морската средина, пишува Index.hr.
Ангажираните нуркачи го проверуваат трупот на бродот под нивото на морето, додека во договор со сопственикот на бродот дополнително е ангажирана компанија за давање комерцијални услуги за спречување и отстранување на загадувањето на морето и морската средина.
Со увидот на надзорните камери, административниот увид на документацијата на бродот и соработката со полициските службеници на поморската и сплитската аеродромска полиција, е утврдена точната бројка на лица кои биле на бродот во моментот на несреќата, вклучително и екипажот. Се проверува и дали се почитувани или прекршени безбедносните одредби пропишани со Законот за поморски законик, односно Правилникот за безбедност на поморската пловидба.
Сплитската полиција соопшти дека синоќа околу 02:30 часот туристички брод со 50 патници удрил во пристаништето на бензинската пумпа на брегот на Бранимир во Сплит. Капетанот на бродот бил приведен и бил во алкохолизирана состојба.
На бродот имало 50 патници и сите успеале да се симнат од бродот до брегот и за среќа нема повредени, пренесува Index.hr.
На местото на несреќата излегле пожарникари, вработени во Капетанијата на пристаништата и полициски службеници.
Истрагата спроведена од Капетанијата на пристаништата е во тек, а капетанот на бродот е донесен во службените простории на полицијата поради тоа што е констатирано дека е во алкохолизирана состојба, а со тоа постојат основи на сомнение дека го сторил кривичното дело прекршок за загрозување на посебни видови сообраќај.
Пожарникарот Иван Ковачевиќ изјави за N1 дека на местото излегле пет противпожарни возила и 13 пожарникари од ЈВП Сплит, како и противпожарен брод со четворица пожарникари.
Според него, тие ги зеле пумпите бидејќи во бродот се уште има гориво. Затоа се поставени заштитни лебдечки мрежи за да се спречи загадувањето на морето.
Видео на следниов линк