Русија тврди дека 694 украински борци се предале во Азовстал во последните 24 часа. Со оваа најнова бројка се тврди дека од понеделникот од фабриката за челик Азовстал се предале вкупно 959 борци. Русија вели дека вкупно 80 од оние што се предале биле ранети, од кои 51 се пренесени во болница.
Дополнително, Русите тврдат дека во текот на ноќта убиле 270 украински борци и „54 единици воена опрема биле онеспособени“. Тие тврдат и дека собориле два авиони и 15 дронови.
Тврдењата не се потврдени од независни институции.
Руското Министерство за одбрана исто така објави соопштение на Телеграм во кое се вели дека им е побарано од истражниот комитет на Русија да обезбеди информации за „незаконските дејствија на украинските вооружени формации поврзани со употреба на цивилни објекти за воени цели“.
Министерството тврди дека „Азовскиот баталјон ги користел зградите на градинките и училиштата како касарни и дека членовите на баталјонот ‘Аидар’ поставуваат и позиции за гаѓање на места кои не се наменети за ова, доведувајќи го во опасност цивилното население“.
Руското Министерство за одбрана, исто така, тврди дека во регионот Днепропетровск, украинските сили организирале воени операции во болниците и дека „персоналот и пациентите во медицинските установи ги држат како жив штит“. Во соопштението се заклучува „Како дел од кривичните случаи кои се под истрага, истражниот комитет ќе ги евидентира овие информации и ќе продолжи да ги утврдува сите околности на инцидентот, како и украинските безбедносни сили вклучени во тоа“.
Истовремено и Канцеларијата на главниот обвинител на Украина, предводена од Ирина Венедиктова, соопшти дека од почетокот на војната се регистрирани наводи за повеќе од 10.700 злосторства на руските сили.