Шарената револуција нема да запре дури и ако се избори за заминувањето на власта, велат демонстрантите кои продолжуваат со разни форми на притисок.
Според нив во Македонија треба да се направат уште многу промени, а притисокот ќе продолжи во различни форми.
Учесниците во Шарената Револуција поделени во групи денеска блокираа четири раскрсници во Скопје. Еден час напладне блокирани беа раскрсниците кај Соборниот храм, Судска палата, Црвениот крст и Министерството за економија.
Демонстрантот Александар Богдановски изјави дека Шарената дека целта на блокадите е да им долови на сите граѓани кои немале шанса да ги слушнат „бомбите“ што значи притисокот на државата кон граѓаните.
-Шарената Револуција продолжува да делува, ова е симболичен начин на претставување на револтот на блокираните институции во државата. Ова што се случува на улиците, истото се случува во државните институции, сите се блокирани. Ова е симболичен начин да покажеме што значи блокирана држава. Начинот на изразување на револтот ќе продолжи, се до остварување на ултиматумот, односно исполнување на целите. Сакам да се извинам до сите граѓани кои се наоѓаат затечени во сообраќајот, меѓутоа ова е начинот и симболиката на која делува Шарената револуција. Револуцијата нема да застане со денот на заминувањето на Груевски со власта ниту со трите барања. Во оваа државата треба да се направат многу промени, вели Богдановски.
Освен Скопјани, на блокадата близу Соборниот храм се појави и пезиониран хирург од Велес, др. Никола Нацев кој побара одлуките на Иванов за колективна аболиција, а подоцна и понишувањето да се пријават за во Гинисовата книга на рекорди.
-Овие криминалци не може да опстојат. Ќе паднат, ќе бидеме сведоци на големи апсења на мали човечиња. Јас како доктор му се чудам на претседателот на државата, кој половина од населението не го признава. Му се чудам , претседател на држава во еден месец да носи такви шаренолики одлуки. Ние сме сигурно за Гинис по овие аболиции, рече Нацев.
На блокадата кај Соборна дојде и до вербална расправија со возач на мотор, кој првенствено пристапи како поддржувач на демонстантите, а подоцна почна со навреди да дофрла, по што демонстрантите бурно реагираа.
Со масовниот протест завчера по повод годнишнина од смртта на Мартин Нешковски, демонстрантите поставија ултиматум до власта за исполнување на нивните приоритетни барања до 18 јуни.
Тие бараат Уставниот суд да се произнесе за уставноста на Специјалното јавно обвинителство, бидејќи е под ризик да се прогласи за неуставно, да запре прогонот врз демонстрантите и да се ослободат сите приведени и да се повлечат кривичните пријави од МВР.
Де од барања се и, оставка од Владата на ДУИ и ВМРО ДПМНЕ и формирање на преодна влада, формирање на специјално одделение во Кривичниот суд за случаите под јурисдикција на СЈО, задолжително присуство на граѓаните при решавањето на кризата, како и оставка од Претседателот Иванов.