Море од мизерија. Вака Советот на Европа ги опишува затворите во Македонија во извештајот објавен денес.
Од 2006 година до денес Советот на Европа остро ја критикува Македонија за нехуманите услови во кои живеат затворениците. Комитетот за превенција на тортура, деградирачки третман и казна (КПТ) денес објави уште еден извештај од кој Македонија треба да се засрами.
Најострите критики се упатени до затворот во Идризово во кој се наоѓаат 60 проценти од сите осудени во земјата.
Eве еден дел од описот на Советот на Европа за мизерните услови.
Санитариите се оштетени, пропуштаат вода и смрдат, тушевите не работат а топла вода нема често, греењето работи само неколку часа на ден. Па така посетителите од Советот на Европа забележале дека затворениците се искасани од разни инсекти и имаат шуга.
Затворите се пренатрупани. Извештајот дава и пример.
Во делот наречен “школо” во 38 м2 се сместени 18 лица; во собата 28 во Крилото 2 во 64 м2 се сместени 30 затвореници; во собата 13 од Крилото 2 во 44 м2 има 25 затвореници; 6 лица во ќелијата наречена”амбуланта”. И тоа е така од 2014 година.
Но ако затвореникот има пари може да најде место и во пристојни услови. Така, посетителите од Советот на Европа во Идризово влегле и во Крилото 9 каде што “условите се одлични”.
Во една ќелија од 11 м2 се сместени двајца затвореници, ќелијата има тепих, кожен кауч и дрвени кревети, има плазма телевизор, фрижидер, можност да се зготви оброк па дури и климатизација. Заедничките простории се исто така добри: со аквариум, маси, столици и каучи, можност за правење гимнастика….
“Контрастот е шокантен”, велат експертите од Советот на Европа и додаваат: “За жал, ова е флагрантен показател за коруптивниот систем и јасно покажува кој ја има моќта во затворот”.
Македонија едноставно не знае како се менаџираат вакви комплексни институции. Од извештајот од 2006 година до денес не е направен никаков напредок.
Во Идризово нема здравствен систем и тоа ги доведува во прашање животите на затворениците, затворениците немаат никаква конструктивна активност а “условите во повеќе делови на затворот можат да се сметаат за нехумани”, вели извештајот.
Сето тоа води во насилство помеѓу затворениците и корупција. Тоа е меѓу другото и последица на малиот број вработени во затворите а и тие чуварите на затворите немаат обука ниту пак било каква поддршка од државата.
Затворот во Шутка (истражното одделение на Затворот Скопје) е посебна приказна. КПТ вели дека овој затвор “на затворениците им нуди остатоци од репресивното минато; затворениците мораат да бидат во ќелиите и по 23 часа на ден и тоа во периоди кои надминуваат две години. Затворениците немаат можност да се посветат на некој активност, освен слушање радио, читање и играње карти.
Ситуацијата во затворот во Штип не е толку лоша како во Идризово но и таму ќелите се пренатрупани а затворениците и во Штип немаат активности.
“Време е и во затворите да биде применето владеењето на правото и заштитата на човековите права”, вели КПТ и додава дека Македонија мора да почне да ги исполнува своите меѓународни обврски и да соработува со КПТ.
Извештајот и бил испратен на македонската Влада на почетокот на оваа година, а таа испратила и одговор. Тој бил испратен од актуелната Влада во јули, до Министерството за надворешни работи, кое потоа го проследило до Комитетот. Во него се вели дека се спремаат повеќе програми за подобрување на условите во затворите и ветува дека сите барања на КПТ ќе бидат исполнети. Новата Влада е таа што треба да ги исполни барања на Советот на Европа и ветувањата на претходната.
НОВА беше првата телевизија која влезе во затворот во Идризово. Еве ја репортажата на Борјан Јовановски :