Сите деца и нивниот тренер се извлечени од пештерата во Тајланд каде беа заглавени од 23 јуни кога влегле во неа после тренинг.
Во пештерата засега се уште еден лекар и тројца припадници на морнаричките нуркачи „Фоки“.
Сите досега извлечени момчиња со хеликоптер се пренесени во болница во блискиот град Чианг Раи.
Спасувачката операција трае три дена, и секој ден досега беа извлекувани по четири момчиња.
Во третиот ден од операцијата во пештерата Там Луанг влегле 19 спасувачи. На еден искусен нуркач за пристап до местото на кое се наоѓаат децата и враќање назад, му се потребни 11 часа. Рутата е долга неколку километри и минува низ матна застоена вода, тесни канали, скали и други препреки. На некои места видливоста во водата е речиси нула.
Денеска се објавени и информации за состојбата на децата кои беа спасени во изминатите два дена. Првите четири спасени деца побарале да јадат традиционално тајландско јадење со босилек, но докторите им рекле дека нивните дигестивни системи не можат да се справат со толку пржен оброк. Тајландскиот министер за здравство денеска изјави дека децата што беа вчера спасени побарале леб со еурокрем, и оти барањето им било исполнето.
Докторите кои ги лекуваат спасените момчиња соопштија дека телесната температура на првите четири момчиња кои беа спасени била многу ниска и постои сомневање дека две од нив имаат запаление на белите дробови и примаат антибиотици.
Операцијата имаше среќен крај за 11 момчиња и тренерот на фудбалскиот тим „Диви вепри“, но таа же остане запаметена по една жртва: еден од нуркачите за време на исклучително опасната и тешка операција го загуби животот, откако останал без кислород. Се работи за поранешниот морнар Саман Гунан кој загина во петокот, додека се враќал од мисија да ја обезбеди групата со резервоари за кислород.
Во меѓувреме, тајландските момчиња, на возраст меѓу 11 и 16 години, и нивниот тренер, се поканети од страна на ФИФА на финалето на Светското првенство. Но, тие веројатно се уште ќе бидат во изолација и натпреварот ќе го гледаат на телевизија.
Cheers, applause, relief at the volunteer site #ThamLuangCave pic.twitter.com/vao6YEih8S
— michael safi (@safimichael) July 10, 2018