Новинарска екипа на унгарскиот портал „24.ху“ го сними Никола Груевски во Будимпешта, како руча во познат унгарски ресторан. Од видео материјалот и фотографиите се гледа дека Груевски е со неколку лица, најверојатно обезбедување, а заминува со автомобил со возач.
-Познатиот бегалец Никола Груевски живее безгрижен живот во Унгарија. Денеска (среда) тој денеска беше на ручек во еден од скапите ресторани во Будим на улицата Пустазери „57“, објавува порталот. Во веста се наведува дека тој бил со двајца, по што си заминал.
На излегување, новинарот му се доближува и му поставува неколку прашања: Како избегал од Македонија и дали Унгарците му помогнале. Но Груевски не одговара и набрзина влегува во црниот автомобил марка „Фолксваген шарон“ кој со голема брзина го напушта местото.
-Груевски како да беше подготвен на ова и брзо влезе во автомобилот и избега, пишува порталот.
Обвинителката Вилма Ристовска денеска изјави дека јавното oбвинителство во наредните две недели ќе излезе со информации за резултатите од предистражната постапка за бегството на поранешниот премиер Никола Груевски и начинот на кој ја напуштил земјава. Наредната недела претставници од Обвинителството ќе одат во Црна Гора да ги земат видео материјалите поврзани со овој случај, а од Албанија се бара и таа што поскоро да ги достави материјалите со кои располага.