Во потрага по десетгодишниот Петар, спелеолозите и денеска се спуштаат во рударското окно длабоко 70 метри, а спасувачкиот тим од Велес утре ќе ја пребарува и Црна река, потврди за НоваТВ Севгани Ибрахими, раководител на одделението за организациски работи во Дирекцијата за заштита и спасување.
Денеска е седми ден од потрагата која уште вчера продолжи во напуштениот рудник „Партизанка“ во чии јами никој не влегол веќе 40 години. Но Петар Џобоски, кој исчезна во петокот од прилепското село Врбско, не бил пронајден ниту таму.
– Спасителот Дарко Неданоски од службата Златоврв вчера успеа да влезе 70 метри во окното на рудникот, но ништо не забележал. Акцијата продолжува и денеска на истото место, спасителите повторно се спуштаат во рудникот. Според планот, утре во потрагата по Петар се вклучува и тимот на Дирекцијата од Велес, нуркачи ќе ја пребаруваат реката која е во близина на селото, додаде Ибрахими.
Поради големите снежни наноси, потрагата завчера беше стопирана на половина пат до рудникот, а од Дирекцијата беа итно побарани моторни санки за екипите да може да стасаат дотаму.
Од СВР Битола ни изјавија дека интензивната потрага и понатаму продолжува, се до пронаоѓање на детето.
– Во врска со потрагата по детето Петар Џобоски од Прилеп, кое за оддалечено од домот во с.Врбско го пријави неговиот татко на 25.02.2022 во полициска станица во 18.46 часот, Ве известуваме дека екипи од полициски службеници од ОВР Прилеп, пограничната станица Старавина и Витолиште, ловџии и селани од околното село веднаш излегоа на терен во потрага по него. Во акцијата се вклучени над 100 полициски службеници, хеликоптер, кучиња трагачи, дронови, членови на Територијалната противпожарна единица Прилеп, членови на спасителната служба „Златоврв“, ловечкото друштво „Мукос“ – Прилеп, Дирекцијта за заштита и спасување, припадници на АРСМ, граѓани – доброволци. Сите служби навремено се известени за неговото исчезнување и веднаш е започната потрага по детето.
Спасителите пред тргнување кон рудникот (ФОТО: Служба Златоврв)
Љубица Балабан