Премиерот Зоран Заев на почетокот на денешната седница на која се расправа за Предлог законот за ратификација на Договорот со Грција, ги повика пратениците да го ратификуваат Договорот за кој потоа ќе гласаат и граѓаните на рефрендум.
-Потпишавме договор со кој се означува почеток на крајот на неизвесноста и на трауматичен период со кој постигнавме достоинствено решение на двете страни . Имаме договор со јасни обележја на македонскиот јазик и идентитет. Го заштитуваме идентитетот за век и векови, кажа Заев.
Заев во воведното обраќање ги повика и пратениците и граѓаните „да ги отфрлиме ѕидовите на ксенофобија и изолираност и да му дадеме шанса на Договорот“.
Со Договорот, рече Заев, Македонија не само што добива нов стратешки партнер во Грција, туку ја остварува и вековната аспирација на нашите предци да бидеме признаени од целиот свет како македонски народ кој зборува македонски јазик.
Повика на обединување во интерес на заедничката иднина.
– Наместо со горчина и гнев, заедно да ги испишуваме идните страници, да ги поведеме граѓаните кон заедничка просперитетна Македонија по примерот на напредните европски земји. Европското семејство не проифаќа како Македонци. Добиваме уште еден пријател и стратешки партнер, ја гарантираме стабилноста и безбедноста на Макеоднија, го отвораме патот кон ЕУ и НАТО. Се остварува стремежот на предците да бидеме признаени од сите како Македонци кои зборуваат македонски јазик. Ова е историски чин со која Македонија и граѓаните добиваат шанса, истакна премиерот Зоран Заев.
Артан Груби од ДИУ кажа дека сите парламентарни групи и 80 проценти од граѓаните поддржуваат евроатлантска интеграција, освен една политичка партија која е против. „Кој е во право?“, праша Груби.
-Непримерно е да си го криеш лицето за да протестираш и да се криеш зад неодлучноста, на денешниот ден кој сите ќе го паметиме целиот живот и ќе го има во учебниците, рече Груби.
И кога Скендербег војувал и кога Гоце Делчев војувал, некои ги нарекувале предавници, но тие денеска се нашите херои, рече Груби, алудирајќи на тоа што претставници од власта и владејачкото мнозинство беа нарекувани „предавници“ од противниците на договорот.
Според Груби, Македонија е на крстосница на која граѓаните треба да изберат дали се за дестабилизација или за Европа.
-Денеска навистина се раѓа сонцето на слободата, на еднаквоста, на припадноста, на исполнувањето на заедничкиот сон за евроатлантска Македонија. Дали некој од нас може да го смени правецот на ветерот? Не, но можеме да ги исправиме едрата кон вистинската дестинација, на Запад каде изгрева нашето сонце, предодредено од нашите преродбеници. Нашите деца утре ќе бидат под сенката на европското дрво кое го засадуваме денеска во Собранието, со лидерство и мисионерство. Тоа ние денеска го правиме, а утре секако ќе се разреди, а како за нас и следните генерации ќе се раздени, зависи како ние на денешен ден ќе сработиме. Денеска ми трепери срцето дека ја чувствувам Македонија како моја држава, рече Груби.
За дискусија се пријавени уште осуммина пратеници. Опозицијата не присуствува на седницата.
За Ратификација на Договорот потребно е да гласаат 61 пратеник.