Изминатите две и пол години се покажа дека судството остана последната тврдина на заробената држава и под контрола на одреден број на судии и обвинители на моќни позиции, рече премиерот Зоран Заев во видео обраќање до јавноста. Ги нарече „последни упоришта на заробената правда кои ги контролираат судските процеси во кои се осомничени протагонистите на режимот, злоупотребувајќи ја одвоеноста на судската од извршната власт, т.н. „Сваровски судски центри на моќ“ застанаа на патот на правдата“.

ВМРО ДПМНЕ, пак, го повика премиерот Заев да престане со притисоци врз судската власт и од таму истакнуваат дека се против амнестии и аболиции.

„Зоран Заев преку Уставниот суд создава можност по поразот на предвремените парламентарни избори да биде амнестиран за сите коруптивни афери и зделки. За да се оствари тоа, Уставниот суд ќе создаде пракса, а Пендаровски ќе реализира. Одлуката на Уставниот суд е јасен показател дека тој, како и останатото судство, целосно се потчинија на волјата на премиерот и на СДСМ“, се вели во реакцијата од најголемата опозициска партија.