Твитер, Спотифај, Амазон, еБеј како и медиумите Си-Ен-Ен или Њујорк Тајмс, Фајнаншл Тајмс, Гардијан или Бостон Глоуб во петокот беа недостапни за голем дел од Американците. Причина е сајбернапад врз една фирма посредник помеѓу сајтот и провајдерите на интернет улсугата.
Според сајтот Политико, групи хакери кои им припаѓаат на Анонимус и Њу Ворлд изјавиле дека тие стојат зад нападите а тоа го правеле за да му дадат поддршка на основачот на Викиликс Џулијан Асанж. Пред неколку дена владата на Екватор, каде Асанж престојува, му го изгаснала на основачот на Виликилс пристапот до интернет.
“Сакавме да ја тестираме нашата моќ”, изјавил за Политико еден портпарол на Њу Ворлд чиј што псевдоним е Профет.
Но американската истрага која ја води ФБИ заедно со внатрешната безбедност е скептична и тврди дека се уште нема докази за да може ова да го потврди.
Нападот беше во форма на одбивање на услуга или, за познавачите, DDoS. Нападот се состои во оневозможување на серверот преку ставање премногу барања или трошење на ресурсите до нивно исцрпување. Тоа доаѓа од мрежа зомби компјутери кои се исто така хакирани. Во овој случај цел била фирмата Дин која е мост помеѓу ИП адресите и имињата на интернет сајтовите.
Овој вид напади е се почест. Неодамна Јаху беше жртва на ваков напад и беа доведени во опасност приватните податоци на над 500 милиони корисници. Повеќе напади беа забележани и врз финансискиот сектор и некои централни банки па така индустријализираните земји во рамките на Г7 пред неколку дена усвоија редица мерки за заштита.
Овде може да се наброи и нападот врз американската претседателска кампања со објавувањето, од страна на Викиликс, на мејловите на директорот на кампањата на Хилари Клинтон.
Според Бен Џонсон, поранешен хакер за НСА а коосновач на фирмата за информатичка безбедност Карбон Блек интернетот и денес функционира според протоколи кои беа креирани во периодот кога немаше сајбернапади. Тој тврди дека ваквите напади ќе продолжат и ова е само почеток на сајбернападите.