Од 80 до 166 лица кои биле вработени од поранешниот Генерален секретаријат на Владата земале плата, а не доаѓале на работа, соопштија од Владата. Ова, како што се вели во нивното соопштение го покажала внатрешната ревизија на Генералниот секретаријат.
„Исплатата на платата според внатрешната ревизија е направена за неизвршена задача што е во спротивност со Законот за работни односи како и Законот за административните службеници. Во 2016 година за 166 државни службеници кои не доаѓале на работа биле исплатени 50.776.872 денари или речиси 830 илјади евра, со што, за истата сума, е оштетен буџетот на Република Македонија“, пишува во соопштението на Владата.
Од таму велат дека формирана е комисија и отворена е дисциплинска постапка против вработените лица, која, во согласност со Изборниот законик, својата работа ќе ја продолжи по завршувањето на локалните избори.
„Упатуваме на тоа, дека за овие случаи постои можна одговорност и кај работодавачот и кај работниците. По завршување на дисциплинската постапка ќе ја информираме јавноста за понатамошниот тек на постапката“, се вели во соопштението.
Вчера, генералниот секретар на Владата, Драги Рашковски, на својот профил на Фејсбук објави документи во кои се гледа дека вкупно 78 државни службеници иако не доаѓале на работа со години добивале плата.