Македонија треба да создаде атмосфера во која жените ќе се чувствуваат безбедно за да поднесат жалби доколку над нив е извршено насилство и треба да се сфатат сериозно, ова е пораката на комесарот за човекови права на Советот на Европа Нилс Муижниекс во интервју за МИА.
Неговиот шестгодишен мандат завршува во април а него ќе го наследи Дуња Мијатовиќ што македонската јавност ја запозна додека беше задолжена за слобода на медиумите во Европа во ОБСЕ.
Македонија, која неодамна ја ратификуваше Истанбулската конвенција за борба против насилството врз жените, треба да ја искористи оваа повелба, вели Муижниекс, како важна платформа во својата борба против родовото насилство.
“Истанбулската конвенција е одлична алатка која може да промовира дискусии за родовите стереотипи во образованието, во медиумите, во политичкиот дискурс, да се разгледа што е тоа репродуцира нееднаквост, стари стереотипи? Кога имате таков вид на нееднаквост, тогаш се случуваат сексуални напади и вознемирувања”, вели тој.
На прашањето дали е добра вест тоа што во Македонија се појави движењето #сегакажувам по пример на глобалното #metoo движење во кое жените проговоруваат за сексуалните малтретирања, тој вели:
“Прво, сведочењата треба сериозно да се сфатат. Второ, има два аспекта. Едното е криминалното однесување, тоа е силувањето, присилувањето од позиција на моќ, итн. Тоа треба да биде санкционирано со закон. Прашањето е до која мера вашата законска рамка е способна да се справи со тие појави. До која мера вашите адвокати, судии се обучени да се справат со тие случаи? Потоа, се поставува прашањето колку жените се чувствуваат небезбедно во професионалната средина? До која мера се жените застапени? До која мера мажите прават невкусни коментари за нив во професионални и други средини?”, вели комесарот.
И додава дека тоа не е толку легално прашање колку што е културолошки и политички проблем, кој треба да биде решен.
“Бидејќи често непристојните работи не се нелегални, навредливи се, болни се, невкусни се, но не секогаш се санкционираат со закон. Треба да се смени начинот на кој бизнисот гледа на овие работи, организациите, институциите. Но, Владата е таа што треба да води, треба да го покаже патот преку своите политики во државната администрација, но и во компаниите со кои има поврзаност. Треба да создаде атмосфера во која жените ќе се чувствуваат безбедно да поднесат жалби и да се сфатат сериозно”, вели комесарот.
Во интервјуто за МИА комесарот ја дава својата оценка за состојбата со човековите права во Македонија, со посебен осврт кон етничките прашања, за етничката сегрегација во училиштата, за проблемите со законот за јазици и родовата нееднаквост. Целото интервју може да се прочита тука.