Денеска на пладне Владата ќе ја одржи втората седница. Дневниот ред на точките за кои ќе расправаат министрите се уште не е познат, но како што неофицијално дознаваме и на оваа седница ќе се одлучува за кадровски решенија.
На првиот работен ден на новата Влада, вчера, Министерството за финансии исплати 4 милијарди 174 милиони денари пензија за месец мај на 301.660 пензионери.
Исто така исплатени се и студентските стипендии во висина 118,2 милиони денари за изминатите 5 месеци колку што доцнеше исплатата.
Субвенции добија и земјоделците и сточарите во вкупна вредност од 439 милиони денари за субвенции, од кои за житни култури 114,1 милиони денари, за лозови насади 31,8 милиони денари, за градинарски култури 36,3 милиони денари, за мерката одгледување на говеда 100 милиони денари, за одгледување на овци 154 милиони денари и за млеко 2,7 милиони денари.
На првата владина седница, беа назначени и замениците премиери, а задолженија добија и министрите без ресор. Како што се наведува во соопштението, во Владата на Зоран Заев ќе има петмина вицепремиери:
–Радмила Шекеринска Јанковска, за заменичка на претседателот на Владата и министерка за одбрана
–Оливер Спасовски, за заменик на претседателот на Владата и министер за внатрешни работи
–Бујар Османи, министер без ресор, за заменик на претседателот на Владата, задолжен за европски прашања
–Кочо Анѓушев, министер без ресор, за заменик на претседателот на Владата, задолжен за економски прашања и за координација со економските ресори
–Хазби Лика, министер без ресор, за заменик на претседателот на Владата, задолжен за спроведување на Рамковниот договор и политички систем.
Определени се и надлежностите на седуммината министри без ресор. Од нив тројца ќе бидат задолжени за странски инвестиции: Аднан Ќахил, Зорица Апостоловска и Рамиз Мерко.
Во економскиот сектор ќе биде и Зоран Шапуриќ, кој езадолжен за регулатива за подобрување на инвестициската клима за домашните претпријатија.
Роберт Поповски е задолжен за комуникации, отчетност и транспарентност, за дијаспората Едмонд Адеми, додека Самка Ибраимовски е задолжен за имплементација на Стратегијата за подобрување на состојбата на Ромите во Република Македонија
За генерален секретар на Владата на Република Македонија е именуван Драги Рашковски, а за шеф на Кабинетот на премиерот Заев е назначена Мирјана Јанева, која доаѓа од Општина Струмица и важи за близок човек на премиерот.
На истата седница формирани се и основните комисии на Владата, како и Управувачкиот комитет за координација и управување во системот за управување со кризи, со кого ќе раководи Оливер Спасовски.