Владата ќе го поништи тендерот за гасификација на Македонија. Од таму велат дека е пристигната само една понуда и согласно законот, постапката ќе биде поништена. За да може да продолжи процесот на гасификација поради оставка на претходниот претседател на Комисијата за тендерски постапки, како привремено решение на таа функција е назначен Љупчо Петкуќески, кој е советник на вицепремиерот за економски прашања Кочо Анѓушев.
„Именувањето е времено решение со единствена работна задача да се финализира тендерската постапка. Владата на Република Македонија, на вчерашната седница ја разгледа и усвои информација за тендерската постапка за доделување договори за јавно приватно партнерство за финансирање, оддржување и развивање на дистрибутивен систем на природен гас во региони 1, 2, 3.“ – соопштија од владата.
Вицепремиерот за економски прашања Кочо Анѓушев од Трст порача дека Владата посветено ќе работи на гасифицирање на Македонија.
„Ќе работиме на создавање на бизнис-амбиент за здрави и успешни компании, а не да се создаваат политички компании од страна на власта. Изградбата на инфраструктурата ќе ни биде приоритет, ќе работиме на изградба на патна инфраструктура и на гасификација на земјава, а токму преку инфраструктурата ќе докажеме дека сме силно посветени на регионално поврзување.“ – изјави Кочо Анѓушев, вицепремиер за економски прашања
Гасификацијата на земјава се најавува неколку години наназад. Неколку пати по ред пропаѓаа тендерите за гасификација во скопскиот и во останатите региони на земајава. Во фаза на евалуација беше запрен и петтиот тендер за гасификација на скопскиот регион заради тоа што избраната фирма бараше пролонгирање на терминот. Заради понуда од една фирма пропадна и тендерот за изградба на дистрибутивна мрежа во 63 општини од Источна, централна и западна Македонија.
За гасификацијата за централна и источна Македонија беше предвидено да се потрошат околу 28 милиони евра, а за западниот дел на земјва заедно со Пелагонија 23 милиони евра. Дистрибутивната мрежа требаше да биде градена со Јавно – приватно партнерство.