Македонската Влада претпладнево објави јавен повик за интервентна набавка на заштитни маски со цел спречување на последиците од коронавирусот за време на вонредната состојба. Маските треба да бидат изработени од материјал што е погоден за нивно производство обезбеден од понудувачот или од материјал погоден за производство на заштитни маски обезбеден од Владата.
Економските оператори што ќе се јават на овој повик треба да ги исполнуваат следните услови и тоа:
– Испорака на најмалку 2.000 маски дневно
– Маските да бидат за повеќекратна употреба и да може да се перат
– Испораката да се врши за период на траење на вонредната состојба на различни локации во Скопје;
– Единечната цена по маска да изнесува максимум 40 денари плус данок на додадена вредност за маските изработени од материјал за изработка во сопственост на економскиот оператор
– Единечната цена по маска да изнесува максимум 25 денари плус данок на додадена вредност за маските изработени од материјал обезбеден од страна на Владата на Република Северна Македонија
– За материјалот од кои ќе се изработуваат заштитните маски потребно е да се поседува соодветен сертификат за квалитет издаден од страна на овластена лабораторија.
Понудите за овој повик треба да се достават во затворен плик, по пошта или лично до архивата на Владата.
Јавниот повик ќе трае 24 часа од моментот на неговото објавување на веб страната на Владата на РСМ, односно понудите треба да бидат доставени најдоцна до 26 март до 15.30 часот. Понудите кои нема да бидат доставени во предвидениот рок нема да бидат разгледувани. Пристигнатите понуди ќе бидат разгледувани и оценувани од Комисија три члена од редовите на Генералниот секретаријат.
Економскиот оператор кој ќе достави понуда и ќе склучи договор, доколку не го исполни предметот на набавката според квалитет и квантитет ќе добие негативна референца за учество на јавни набавки.