Северна Македонија ги спроведе сите реформи, исполнети се сите критериуми на ЕУ за отворање на процесот за членство, за што впрочем и има одлука за почеток на преговорите уште во 2020 година, велат од Владата по вчерашниот повик на албанскиот премиер Еди Рама, Албанија да се одвои од Македонија во процесот на добивање датум за пристапни преговори.
„Во однос на раздвојувањето на Република Албанија во овој процес, позицијата на Европската комисија е да бидат усвоени преговарачките рамки и да се одржат меѓувладините конференции со двете земји. Ова е процес заснован на заслуги, и двете земји спроведоа сериозни реформи, затоа почетокот на пристапниот процес со двете земји е најдобрата и единствената опција, во интерес на обезбедувањето на перспектива и стабилност на целиот регион, потенцираат од Владата за НоваТВ.
Експертите, пак, разочарано констатираат дека потегот на официјална Тирана не е изненадување, иако ја затече македонската јавност.
Малинка Ристевска Јорданова од Институтот за европска политика вели дека опасноста Албанија да побара соло статус, тлеела од поодамна. „Одамна оваа тема тлее на тивок оган, беше прашање на време кога ќе се вжешти. За Македонија ова ја прави ситуацијата посложена и создава поголем притисок за решавање на спорот со Бугарија“, изјави таа за НоваТВ.
Меѓутоа, како што додава Ристевска Јорданова, треба да се има предвид како ќе изреагираат на барањето од Тирана државите членки на ЕУ кои се уште не се расположени за раздвојување на двете држави, како и кои се нашите долгорочни интереси, вели таа. „Ние треба да си ги штитиме нашите интереси. Имало досега одвојувања и спојувања во процесот, па сепак сите во регионот сме далеку од посакуваната и можна интеграција“, потенцира Малинка Ристевска Јорданова.
Апелот на албанскиот премиер како никого да не го загрижи во државата. Отсуствуваат било какви реакции, особено од Владата и од надлежниот министер Бојан Маричиќ иако почетокот на преговорите со ЕУ е централно политичко прашање во Скопје, а партнерството со Албанија даваше надеж дека Унијата ќе сака побрзо да го разреши конфликтот кој го наметна Бугарија.
„Албанија веќе не може да чека двата соседa да го решат спорот. Нашиот политички курс по ова прашање целосно ќе се промени“, ја пренесе вчера Ројтерс изјавата на албанскиот премиер Еди Рама. (С.К.)