Утрешниот ден, 8.август се прогласува за Ден на жалост во знак на загинатите од поплавите, одлучи на денешната вонредна седница на Владата на Република Македонија.
Скопскиот и Тетовскиот регион се прогласени за кризни места во траење од 15 дена, а на семејствата на загинатите, според одлуката на Владата, ќе им се доделат по еднократен паричен надомест во висина од 300.000 денари.
Претходно и град Скопје заклучи дека од градскиот буџет ќе се обесштетат семејствата за секој загинат од по 180.000 денари.
Владата ја задолжила Дирекцијата за заштита и спасување целокупната опрема на Дирекцијата од сите региони во државата да ја стави на располагање во кризните региони, а препорача на општините кои располагаат со вакум цистерни, истите да ги стават на располагање на град Скопје.
Владата ја задолжила и Дирекцијата за заштита и спасување веднаш да изврши ангажирање на дополнителна градежна механизација (скипови, багери и камиони) преку склучените договори за користење на градежна механизација од приватните фирми и истите веднаш да бидат пратени и ставени во функција во кризните подрачја.
Донесена е и одлука за доделување на нафта за потребите на Дирекцијата за заштита и спасување, ЈП Македонија пат, Министерството за одбрана и Министерството за внатрешни работи, а беше заклучено Јавното претпријатие за државни патишта да изврши санирање на обиколницата која беше оштетена во невремето.