Владата усвои пакет мерки за заштита на животниот стандард и за ликвидност на компаниите.
Согласно мерките за намалување на ценовниот шок усвоени на Владата, за 1,2 и 4 денари ќе се намали акцизата за берзанските цени за горивата, и ДДВ-то за промет на енергенси од 18 на 10 процнети, што ќе доведе до поевтина цена на горивата за крајниот потрошувач и тоа за 10.5 денари поевтина цена за дизелот и 11,5 денари би се намалил бензинот.
„Ова ќе биде тешка година, но со добри политики и мерки ќе ја премостиме“, рече премиерот Димитар Ковачевски и најави пакет од 26 мерки за заштита на животниот стандард и за ликвидност на компаниите и мерки за финансиска подршка на комапниите преку развојната банка.
Се намалува ДДВ-то за основните прехранбени производи од 5 на 0 проценти и тоа за лебот, шеќерот, брашното ТИП 400 и сончогледовото масло, млекото, свежо месо, ориз и јајца.
„Ги замрзнуваме маржите за основните производи на храна, ги субвенционираме најранливите категории на граѓани со по 1000 денари месечно во период од три месеци мерка која ќе важи за околу 35.000 граѓани“, рече премиерот Ковачевски.
Се укинуваат царинските давачки за увоз на основните прехранбени производи, мерка која ќе важи за сите земји.
Се воведува нова методологија која ќе обезбеди пониска цена за електричната енергија за домаќинствата и за малите потрошувачи, ќе се субвенционираат пензионерите со по 1000 денари месечно во период од три месеци за купување на основни производи, се субвенционира цената на топлинската енергија за дел од потрошувачите во Градот Скопје.
Владата дава препорака со РКЕ за усогласување на цените на нафтените деривати на дневна основа, се додека трае кризата во Европа.
Дополнително се пролонгира воведувањето на еколошката такса за енергенсите, а се дава препорака до Општините да го усогласат Јавниот превоз да биде достапен за сите граѓани.
Мерките биле димензионирани на Економски совет на Владата на кои присуствувале и членови на Академијата, гувернерката на НМРМ, стопанските комори, поголемите компании во земјата и синдикалните организации. Пакет мерките тежат 400 милиони евра.
Дополнително Владата обзнани и мерки за финансиска подршка на комапниите преку Развојната банка.
За да стапат на сила предлог мерките на Владата ќе треба да бидат усвоени во Собранието.
„За да се усвојат мерките за намалување на крајната цена на нафтените деривати потребна е промена во Законот за ДДВ и Законот за акцизи. Оттука ги повикувам народните избраници веднаш штом ги испратиме предлог измените на овие Законот во Собранието да ги усвојат, а тие ќе стапат на сила откако ќе поминат во Собрание и ќе бидат објавени во Службен весник“, рече премиерот Ковачевски во одговор на новинарско прашање.
Во пресрет на најавената прес конференција во Владата, повеќе политички партии излегоа со свои предлози околу креирање на антикризни мерки со цел ублажување на ценовниот шок.
Од Демократскиот сојуз на Павле Трајанов, предложија до Владата, покрај намалување на ДДВ-то и акцизите за нафтата и гасот, да се поттикне производството на стратешки производи како што се пченка, јачмен, репка, ориз, но и одгледување на сточен фонд. Од партијата ги повикаа граѓаните да купуваат домашни раноградинарски производи со цел да се намалат штетите од завторањето на странските пазари, пред се на пазарите во Украина, каде извезуваат нашите производители.
Во меѓувреме, пратеничката група на ВМРО-ДПМНЕ, побара итна пленарна седница во Собранието на која би се разгледале нивните предлози за намалување на акцизите на горивата за 50% и намалување на ДДВ-то на сите производи за исхрана од 5% на 0%.
Претходно и лидерот на ВМРО ДПМНЕ, Христијан Мицкоски, преку статус на Фејсбук, табеларно појасни на кој начин се прават пресметките за крајната цена на горивата која ја плаќаат потрошувачите и како предлогот на опозицијата за преполовување на акцизата ќе влијае врз цената на горивата.
(Б.Божиновска)