Премиерот Зоран Заев најави дека во тек се разговори со Турската демократска партија за проширување на паламентрното мнозиство и верува дека овие разговори ќе бидат заокружени до вторник.

-Оваа партија веќе дава поддршка на законските решенија и соработката не е условена со некои места, но треба да се заокружи. Размислувам и за средби со БЕСА и тоа со двете групи, се надевам дека ќе најдат нешто што ќе ги спои во една, бидејќи гледам дека пратениците соработуваат меѓу себе. Потоа ќе се разговара и со пратеници кои се во опозиција, рече Заев.

Тој рече дека на оваа тема не разговарал со претседателот на коалицискиот партнер ДУИ, Али Ахмети, но дека е можно пазуата на утрешната седницата за пратенички прашања да биде искористена токму за тоа.

Но Заев рече дека има генерална согласност во владејачката коалиција вратата за соработка да остане отворена за нови партии.

-Оставена е можноста на премиерот да разговара со пратеници, политичари и со партии кои се подготвени да ја поддржат Владата во однос на актуелни прашања, како што се: Решавање на спорот што го има Грција со нашето уставно име, реформите, концептот „Едно општество за сите“ и сето она што е за подобрување на квалитетот на животот на граѓаните, рече Заев.

Тој истакна дека има пратеници и политички партии кои се во опозиција, но не се согласуваат со најголемата опозициска партија и нивните ставови се поблиски до ставовите на Владата.

Заев рече дека штом ќе ја помине таа фаза, и од Ахмети и од останатите коалициски партнери ќе бара согласност за проширување на коалицијата и на мнозинството во Парламентот.