ВМРО-ДПМНЕ побара од градоначалникот на Струмица и претседател на СДСМ, Зоран Заев, веднаш да си поднесе неотповиклива оставка од функцијата градоначалник. Според нив, само во тој случај градоначаникот Заев ќе има образ да бара било што од градоначалникот Владимир Талески.
Тие велат дека Заев лицемерно ги обвинува другите за криминал, а самиот без око да му трепне го игнорира фактот дека е единствен градоначалник кој бил во притвор во Истражниот затвор во Скопје обвинет за криминал тежок 8 милиони евра.
„Имено, за 2014-2015 година Општина Струмица има склучено договор за јавна набавка за превоз на ученици, односно деца со посебни потреби во ООУ „Сандо Масев“ и вработените од општинската администрација. Договорот е склучен со фирмата „Тритерол“, која е единствен понудувач на тендерот во износ од 1.864.800 денари. Парите се обезбедени, а јавна тајна е дека учениците и вработените во администрацијата не ја добиваат услугата, односно нема превоз. Овие пари обезбедени од граѓаните се преточуваат во приватен субјект без да се изврши превозот. Ова се вика крадење на граѓаните“, рече пратеникот на ВМРО ДПМНЕ Васил Пишев.
Од општина Струмица, пак, демантираа велејќи дека посочената фирма никогаш не се јавила на тој тендер и оттаму било неможно и да го добие, обвинувајќи дека владејачката партија со лаги сака да го испере битолскиот градоначалник.
а Општината овие сомнежи се невистинити и, како што стои во писмената изјава, ВМРО ДПМНЕ со фабрикуван прес сака да го оцрни градоначалникот Заев и Општина Струмица.
„Вистината вели дека на распишаниот тендер на Општина Струмица за превоз на деца со посебнин потреби во ООУ „Сандо Масев“ , фирмата „Тритерол“ воопшто нема аплицирано, што подразбира дека и не можела да испорача услуга“, стои во реакцијата од Општина Струмица. Од Општината уште додаваат дека доколку имало нешто незаконско, сигурно досега ќе било санкционирано.
„Можеле од ВМРО ДПМНЕ барем да најдат друг човек да ја држи денешната прес-конференција. Васил Пишев многу добро знае на кој начин се добиваат тендери во Општина Струмица, бидејќи тој и неговата фирма „Алмакс“ во времето на градоначалствување на Зоран Заев добивал тендери од Општина Струмица, како и повеќе други компании блиски на неговата партија“, пишува во реакцијата.
Во меѓувреме речиси сите градоначалници од ВМРО ДПМНЕ денеска јавно застанаа во одбрана на битолксиот градоначалник ВладмирТалески кој е осомничен од Специјалното јавно обвинителство за проневера на државни пари со наплата на неколкукратно поскап превоз на ученици. Во своите говори речиси сите градоначалници зборуваа дека се уверени оти Талески бил чесен човек кој не би ги прекршил законите.
Потпретседателот на СДСМ Александар Кирацовски изјави дека правната држава во Македонија мора да профункционира, а битолскиот градоначалник треба веднаш да поднесе оставка
„ Бараме Битола да не биде заложник на Владимир Талески и затоа тој мора веднаш, од морални причини, да си поднесе неотповиклива оставка. Ги охрабруваме сите, посебно чесните членови и симпатизери на ВМРО-ДПМНЕ, да не си го валкаат образот за криминалци“ изјави Кирацоски .