Делегација на опозициската партија ВМРО ДПМНЕ предводена од потпретседателот Александар Николовски, денеска околу 13 часот ќе положи цвеќе на Мечкин Камен во Крушево а ќе го посети и гробот на претседателот на првата Република на Балканот-Крушевската Никола Карев во Македониумот. Како дел од оддавањето почест на жртвите од Илинденското Востание, ќе биде положено цвеќе и во месноста Слива над Крушево. Партискиот претседател Христијан Мицкоски ќе ја предводи делегацијата на одбележување на Илинден во струшкото село Ташмаруништа.
ВМРО ДПМНЕ нема да биде дел од државната манифестација на Мечкин Камен организирана од Претседателот на Република Северна Македонија, Стево Пендаровски која почнува во 18 часот. Од партијата велат дека со тоа што Пендаровски немало да одржи говор на Мечкин Камен ја сквернави историјата и значењето на Илинден и АСНОМ за она што е Македонија денес а манифестацијата Мицкоски ја нарече ,,циркуски церемонијал“.
Претседателот на ВМРО ДПМНЕ во сресрет на празникот се огласи и преку статус на фејсбук во кој му порача на шефот на државата дека политичар кој се плашел од својот народ требало веднаш да се спакува и да ја напушти политиката.
– Жалам што поради сопствениот страв од соочување со народот, големата лична суета и елитизмот сакате да обезличите настан кој не е на политичарите, туку тоа е настан на народот. Народот кој се борел за Македонија, кој се бори и ќе продолжи да се бори. Вие еден ден нема да бидете Претседател и ќе заминете, ќе Ве паметат по тоа што ќе оставите позади Вас, но ќе Ве запаметат и по оваа кукавичка одлука да му го одземете на народот чествувањето на жртвата на Илинденците, напиша Мицкоски на „Фејсбук“.
Од кабинетот на претседателот Пендаровски реагираа со соопштение во кое се наведува дека претседателот е крајно непријатно изненаден од квалификацијата на Мицкоски, според која, чествување на најголемиот македонски празник – Илинден, во Крушево ќе биде „циркуски церемонијал“.
– Не се памети, години наназад дека некој наш политичар искажал толку длабоко непочитување кон најголемите херои, креативци и артисти на македонскиот народ и македонските граѓани, со целосно потценување на фактот дека државна делегација на чело со претседателот Пендаровски ќе положи венец и свежи цвеќиња на гробот на првиот претседател на Крушевската република, Никола Карев, на паметникот на хероите на Слива и на самиот Мечкин Камен, а ќе биде присутен и на Панихидата во чест на хероите и нивното дело во црквата „Св. Никола“. Меѓутоа, имајќи го во предвид фактот дека според Мицкоски чествувањето на Илинден во Крушево на 2 Август ќе биде „циркуски церемонијал“, тогаш не изненадува неговата одлука најголемиот македонски празник да го чествува во Ташмаруништа, наместо во Крушево, забележаат од претседателскиот Кабинет.