ВМРО-ДПМНЕ обвинува дека некој ги фрлил нивните амандмани за Законот за употреба на јазиците во контенјер.
„Кому му сметаат амандманите на неуставниот закон за двојазичност? Дали е ова организиран акт и колкумина се вклучени во овој срамен, недемократски чин? Кој ја дал наредбата? Дали со фрлањето на амандманите некој сакал да испрати порака дека е залуден секаков обид за аргументирана дискусија и правно побивање на неуставните закони? Дали некој сакал да испрати порака дека со доаѓањето на власт на Заев демократијата заврши во контејнер и се ќе биде само како што ќе одлучи СДСМ, колку и да се штетни нивните одлуки за државата и народот“, се прашањата кои денеска на прес-конфренција ги постави Дарко Костовски од ВМРО-ДПМНЕ.
– Истрага за овој срамен недемократски инцидент мора да започне и истрага мора да има, а одговорните мора да бидат откриени и санкционирани. Не смее никому да му се дозволи да ја понижува демократијата на овој начин. Ваквите постапки нема да го спречат ВМРО-ДПМНЕ и понатаму да стои во одбрана на законите и Уставот на државата. Законот за двојазичност кој СДСМ насилно го носи е спротивен на Уставот на Република Македонија – рече тој.
Според него, овој закон ја уназадува употребата на македонскиот јазик како кохезивно средство за комуникација на сите заедници во земјата, а неговото вештачко наметнување носи сериозни финансиски импликации.
– СДСМ наместо на сила да го носи законот кој носи штета на граѓаните и државата ја има можноста да го повлече, да ги прифати забелешките и да отвори широка дебата со што ќе покаже дека работи за доброто на граѓаните – нагласи Костовски.