ВМРО-ДПМНЕ не е во можност на амбасадорот на САД, Џес Бејли да му одговори на прашањата за изборите, за кои Бејли се интересирал на средбата со лидерот на партијата Никола Груевски.
Според партиското соопштение, Груевски на Бејли му кажал дека коалициите кои ќе се формираат после изборите не зависат само од ВМРО-ДПМНЕ, туку и од другите партии кои имале влијание од надворешни фактори. Кога амбасадорот се интересирал за какви надворешни фактори станува збор, му било одговорено дека присутните на средбата меѓу кои и претседателот на партијата немаат овластување да му одговорат.
„На прашањето на амбасадорот Бејли дали во тој поглед може нешто да помогне, беше одговорено дека не може да помогне пред се затоа што улогата на амбасадорот е да ја следи состојбата во земјата и да ја информира неговата земја за случувањата.
На забелешката на амбасадорот дека досега тој многу помогнал, му беше изразена благодарност за тоа. Стана збор и за скандалозната одлука на ДИК за поништување на избирачкото место бр. 0396-1 во општина Гостивар, и беа објаснети деталите за незаконската одлука на ДИК.
Амбасадорот апелираше дека е добро да се смират страстите на луѓето кои протестираат, и праша која ќе е реакцијата на ВМРО-ДПМНЕ на одлуките на ДИК, на што беше одговорено дека партијата не е во можност во моментот да му одговори на тоа прашање.
Беше прашано дали ВМРО-ДПМНЕ ќе ги почитува одлуките кои ДИК ќе ги донесе. Беше одговорено дека прашањето е хипотетичко и дека ќе бидат поддржани одлуки кои се во согласност со законот“, пишува во соопштението на партијата.
Лидерот на ВМРО-ДПМНЕ вчера се сретнал и со амбасадорите на ЕУ, Самуел Жбогар и на Норвешка Анре Санес Бјорнстад.