Опозициската ВМРО ДПМНЕ смета дека прифаќањето на обвинението за насилствата од 27 април со кое се опфатени петмина пратеници и други членови и приврзаници на партијата претставува еден од многуте процеси со политичка заднина и една од причините поради кои видни земји членки на ЕУ во нон пејперот јасно укажуваат дека во Република Македонија има партизирано судство.
Според ВМРО ДПМНЕ, власта го користи партизираното судство за пресметка и заплашување на неговите политички неистомисленици и против секој еден граѓанин кој сака да се спротивстави на антидржавните политики на оваа влада.
-Зоран Заев срамниот и штетен договор за името сака да го покрие со продолжување на политичкиот терор. Теророт и политичките хајки имаат за задача да донесат страв и да ја дефокусираат трговијата со државните и национални интереси. Македонија е држава каде премиерот додека прифаќа и договара промена на име и идентитет, пратеници од опозицијата се обвинуваат за тероризам, познати уметници, актер, оперски пејач се прикажуваат за терористи. Правосудството уште еднаш покажа дека е алатка на власта. Одлуката на Кривичниот совет при Кривичниот суд за прифаќање на обвинителниот акт, не е базирана на правна аргументација, туку на политичка присила, се вели во соопштението од партијата.