ВМРО ДПМНЕ, врска со оставката на директорот на Заводот за згрижување на деца со воспитно – социјални проблеми „25 мај“, денеска побара одговорност и од оние кои го поставиле, по обелоденувањето на случајот со 13 годишното девојче, кое додека било во старатество на државата било сексуално злоставувано повеќепати, при што поради бременост и абортирало.
-Директорот што си поднесе оставка не се поставил сам на функцијата. Тој е назначен и претпоставените во хиерархијата морале да имаат увид во неговата работа и да реагираат на несоодветното постапување многу порано, пред да се случи трагедијата, односно последиците по детето, рече Јована Мирчевска, на прес конференцијата пред Министерството за труд.
Од опозициската партија сметаат дека за оваа одговорност имаат сите над него, почнувајќи од првиот човек во МТСП, ОЈО и МВР, кои повеќе од 6 месеци не преземале никакво дејствие во насока на заштита на девојчето.
Според податоците од Министерството за труд и социјална политика сега екс директорот на Домот „25 мај“ Стевче Соколовски на чело на домот е од 2006 година. До 2007 година е вршител на должноста, а од 2007 година наваму е директор, во времето кога на власт беше ВМРО ДПМНЕ.