ВМРО ДПМНЕ смета дека одлуката на Државниот инспекторат за локална самоуправа да ги укине решенијата за одржување референдум против мигранти во 12 општини е крајно недемократска и скандалозна одлука со која се спречува одржување на референдуми и со тоа ја попречува демократијата во државата.
-Државниот инспекторат за локална самоуправа е институција под контрола на Зоран Заев која очигледно по диктат мора да го блокира и оневозможува одржувањето на локалните референдуми за градењето на мигрантски населби и кампови кои ги планира владата согласно акцискиот план и стратегијата која ја донесоа, се вели во соопштението.
Според оваа партија, референдумот е граѓанско и пред се уставно загарантирано право кое како што се вели „Заев со петни жили се обидува да им го оспори“.
-Одржувањето на референдуми во неколку општини во ист ден со локалните избори е единственото логично и рационално решение, бидејќи на тој начин се намалуваат трошоците за одржување и нема ништо спорно во таа одлука на општинските совети, се вели во соопштението.
Од ВМРО ДПМНЕ сметаат дека Уставниот суд „мора веднаш да го отфрли ова решение на државниот инспекторат, водејна ќи се согласно Уставот на Република Македонија“.
-Никој не смее да им забранува на граѓаните да се произнесат за ова крупно општествено прашање во ист трошок со локалните избори. Стравот на СДС не смее да биде пречка, велат од партијата.
Државниот инспекторат денеска донесе одлука да ги запре решенијата за организирање локални референдуми во општините за мигрантите на денот на локалните избори, 15 октомври, и да поведе постапка пред Уставниот суд за утврдување на законитоста.
Како што информира државниот инспектор за локална самоуправа Рахим Муслиу, решение досега е донесено за 12 општини кои доставиле до Инспекторатот извештај од јавното општинско гласило во кој е објавен референдум, а се очекува да бидат доставени уште две.