Делегација на ВМРО-ДПМНЕ денеска, ден пред прославата на Илинден, положи цвеќе пред споменикот на Мечкин Камен. Делегацијата беше во состав Христијан Мицкоски, генерален секретар, и Антонијо Милошоски, Диана Транталоска и Златко Перински, членови на ИК на ВМРО-ДПМНЕ.
Милошоски изјави дека во име на партијата на граѓаните им го честита најголемиот слободарски празник Илинден и во тој спомен денеска дошле да положат букет пред споменикот на паднатите херои на Мечкин Камен.
Тој рече дека тоа го направиле денес од неколку причини.
„Прво затоа што сметаме дека овој Илинден е премногу важен, за на истиот да дадеме легитимитет за нелегално избрани функционери. Второ, затоа што имаме огромна чест како партија, која што ги полага своите корени на историското ВМРО, како современа генерација да им одадеме почит на паднатите жртви за Крушевската Република, која што е темел на современа Република Македонија. И трето, ги повикуваме повторно сите наши членови, симпатизер и граѓани кои сметаат дека оваа порака е соодветна да се воздржат од давање на легитимитет на прослави организирани од владата на СДС и ДУИ, затоа што цениме дека можно е со такви некои одлуки кои што го иритираат народот, како одлуката на господинот Џафери да се обрати тука на Мечкин Камен, да се создадат некои услови или некој да смислил некои намерни инциденти кои што можат да ја нарушат честа и достоинството на Илинден, како еден голем македонски слободарски празник“, изјави Милошоски.