Ако парите од Панорамското тркало се пренаменија за инфраструктурни објекти за заштита од поплава, оваа катастрофа во скопските села немаше да се случи, обвини на денешната прес-конференција потпретседателот на СДСМ Дамјан Манчевски.
-Ќе изградиме ефикасен систем за одбрана на Скопје од големи води. Ќе ги уредиме сливните подрачја, ќе ги исчистиме речните корита и каналскиот систем. Ќе го заштитиме Скопје од порои.Ќе ја санираме скопската обиколница, за да не ги поплавува куќите на жителите од Стајковци и другите населени места.Ќе изградиме системи за атмосферска и фекална канализација кои ќе ги намалат ризиците од поплава. Процентот на рурални населени места покриени со атмосферска канализација од сегашните 18% ќе го подигнеме на 40%. Ќе го заштитиме Стајковско езеро од излевање, рече тој.
На заедничката прес-конференција со Манчевски, дополнителниот заменик-министер Љупчо Николовски најави воведување забрана за изградба на објекти во коритото на „Вардар“ и другите реки во Македонија.
-Нема да дозволиме „Галии“ и други пиратски градби кои го зголемуваат ризикот од поплави.Ќе изградиме современ хидрометеоролошки систем за рано предупредување, за граѓаните во цела Македонија мора да бидат навремено информирани кога има ризик од поплава.Ќе изградиме нови системи за наводнување и одводнување во сите подрачја со најголем ризик од поплава.
Годишно ќе инвестираме 10 милиони евра во вакви системи. Ќе извршиме вистинско пошумување на соголената Скопска Црна Гора и другите ризични планини, наместо да се сликаме за Денот на дрвото, вети Николовски.
Од владејачката партија реагираат. За нив ноторна лага е дека СДСМ е заинтересиран за чистење на одводните канали и безбедноста на граѓаните и нивниот имот.
-Зошто СДСМ со години е против субвенциите за чистење на одводните канали во Гази баба? Зошто СДСМ молчи за проектирањето на обиколница? Зошто СДСМ го ликвидираше Водостопанство во 2005 година, со што предизвика повеќегодишна неможност да се одржуваат и чистат каналите?
Колку километри атмосферска канализација направи нивниот градоначалник во Куманово? Колку километри атмосферска канализација во Струмица по методот „евро за вицето“ направил аболицираниот криминалец Заев? Колку километри атмосферска канализација во Центар направил Жерновски?, реагира ВМРО-ДПМНЕ.