Некогаш осигурувањето во нашата држава се сметаше за луксуз, но новото време ги промени навиките и се повеќе луѓе го осигуруваат својот живот, имот, земјоделски посеви, накит, друг специфичен имот, па дури и делови од телото. Меѓутоа со ширењето на осигурителната култура, расте и незадоволството на граѓаните од осигурителните компании.
На осигуреничка не и било продолжено животното осигурување затоа што се разболела од рак, па ја повикала на помош Агенцијата за супервизија на осигурување која интервенирала за да се реши проблемот. Интервенцијата била успешна, но на површина ги изнесе бројните проблеми во сферата на осигурувањата.
Крсте Шајновски, претседател на Советот на експерти на Агенцијата за супервизија на осигурување вели дека дури за речиси два и пол пати е зголемен бројот на претставките што ги добиваат.
„Агенцијата за супервизија на осигурување доби 206 претставки од незадоволни осигуреници за работата на осигурителни компании и други учесници на пазарот во 2021 година. Бројот на претставки од осигуреници лани е зголемен за 2,4 пати во споредба со 2020 година“, вели Шајновски. „Врз основа на претставки примени од незадоволни осигуреници, на три осигурителни друштва им се изречени четири мерки од кои две се парични глоби“, истакнува тој.
Најчесто осигурениците се жалеле на основот на кој се исплатуваат штети кои биле покриени со договори за осигурувањ како и за висината на износот што осигурителните компании го понудиле за исплата на штета. Има жалби и за роковите за обработка и исплата на штети.
Статистиката на Агенцијата вели дека најголем број претставки – 91 се поднесени за осигурани случаи за автоодговорност, а потоа следат претставки за осигурување од незгода и за имот. Има претставки и за животно осигурување, за приватно здравствено осигурување како и за други осигурителни видови.
„Се обидуваме да изнајдеме решение во сите случаи на претставки и во тоа успеваме – бројот на претставки решени во корист на осигуреници е зголемен за два и пол пати“, вели Шајновски.
Како што потенцираат од Агенцијата во 161 случај подносители на претставки се физички лица, а 39 претставки поднеле правни лица. (Р.Н.)