Сараево: Судот на Босна и Херцеговина го осуди Војин Павловиќ, претседател на проруското здружение „Источна алтернатива“ од Братунац, во република Српска на две и пол години затвор за негирање на геноцидот во Сребреница и глорифицирање на Ратко Младиќ, осуден за воени злосторства во Хаг.
Ова е прва пресуда во БиХ за негирање на геноцид и глорифицирање на осудените за воени злосторства, што се кривични дела според Кривичниот законик на БиХ.
Павловиќ беше осуден за поставување транспарент со ликот на Ратко Младиќ, воениот командант на Војската на Република Српска, и пораката „Среќен роденден, живеј и биди здрав“ на раскрсница во Братунац во март 2023 година.
Павловиќ беше прогласен за виновен и за оправдување на геноцидот во Сребреница со организирање на митинг во Братунац на 11 јули 2023 година, за кој изработил постери со натпис „11 јули – Ден на ослободувањето на Сребреница, благодарност до Војската на Република Српска“. Тој ги постави овие постери на подрачјето на општина Братунац, која се граничи со Сребреница.