Брод, со кој се превезувале над сто мигранти, ноќеска потона во водите на Средоземното Море во близина на бреговите на Либија, соопшти денеска Меѓународната организација за миграции (ИОМ).
Досега се пронајдени осум тела и само четворица преживеани, па се стравува дека сите останати мигранти, кои официјално се водат како исчезнати, се удавиле.
На бродот имало над 100 мигранти, кои по потекло биле од африканските земји.
Во потрага по преживеани мигранти се вклучени бродови и хеликоптер на Европската агенција за контрола на надворешните граници Фронтекс.
Според податоците на ИОМ, во текот на минатата година околу 350.000 мигранти се обиделе да стигнат од Африка до италијанскиот брег, При тоа, во разни несреќи и бродоломи загинаа најмалку 4.600 мигранти.