За Ника Гавровска од „Гаврош“, малиот книжевен деликатесен базар е еклектичен спој од книжевни приказни, приказни од кујната и човечки приказни.
По примерот на многу градови во светот каде што се одржуваат (пред)божиќните или (пред)новогодишните базари, во кафе „Горки“ во организација на издавачките куќи „Чудна шума“, „Сказнувалка“ и „Гаврош“, секоја сабота ќе биде организиран деликатесен книжевен базар, насловен „Кај тарабите“.
Трите книгоиздателства најавуваат низа настани, нови наслови, вкусни деликатеси, попусти и предновогодишни пакетчиња.
Првиот базар го најавуваат за во сабота на 13 ноември Кафе Горки (ул. Луј Пастер) се наоѓа непосредно до ул. Македонија, во уличката на Кино Култура.
За Ника Гавровска од „Гаврош“, малиот книжевен деликатесен базар е еклектичен спој од книжевни приказни, приказни од кујната и човечки приказни.
„Тоа што не спојува со Чудна шума и Сказнувалка е страста со која идеалистички влегуваме во проектите, па делиме иста сатисфакција од убаво издание или разочарување од одреден склоп на околности, амбиент. „Кај тарабите“ е повод за дружба со публиката со која ретко имавме прилика да комуницираме со оглед на кризата. Но, одиме понатаму, духот треба да се храни со нови наслови и по некоја пита од јаболки и топол салеп“, вели Гавровска.
Според Биљана Црвенковска од „Чудна шума“, „по пример на (пред)божиќните или (пред)новогодишните базари што се организираат насекаде, а во кои земаат учество и малите независни издавачки куќи, и базарот „Кај Тарабите“ е осмислен да придонесе со весела, новогодишна атмосфера и интересни содржини за децата и за возрасните, но да понуди и попусти, акциски пакетчиња и други промоции за сите возрасти“.
Искра Димковска од „Сказнувалка“ смета дека настаните за деца и за книги го прават секој град поубаво место за живеење.
„Сакаме книгите што ги издаваме да им ги доближиме на луѓето (на децата) на поинаков, помирислив, разнобоен начин.”, вели Димковска.
А.В