Бројот на корисниците на мобилна телефонија во Македонија годинава за разлика од лани бележи мал пораст и изнесува 95,2 процента, покажуваат резултатите од анкетата на Агенцијата за електронски комуникации (АЕК).
Најголемиот дел од корисниците на интернет преку мобилен, 96,3 проценти, користат апликации за комуникации. Најкористена е „Вибер“ (92,2 проценти), по која следат „Фејсбук месинџер“ (84,4 проценти), Скајп (43,5 проценти) и „Ватс ап“ (25,5 проценти).
Повеќе од половина од испитаниците ги користат тие апликации за комуникација преку текстуални пораки (73,1 процент) и преку разговори (71,6 проценти) секој ден.
Анкетата, спроведена на територијата на Македонија на случаен репрезентативен примерок од 1.100 испитаници во периодот од 19 до 29 мај годинава, покажува дека бројот на припејд корисници е намален на 28,8 проценти, а корисниците на мобилен телефон се почесто телефонираат од мобилен на фиксен кога имаат потреба (37 проценти).
Доколку се појави нов оператор на мобилна телефонија, за да ги привлече корисниците, првенствено би требало да понуди пониски цени за разговор (83,4 проценти), пониски цени за мобилен интернет (37,6 проценти) и подобар квалитет на говорните услуги (31,8 проценти).
30,6 проценти од испитаниците би сакале побрз интернет, а 25 проценти – поповолни цени на телефонските апарати. Десет проценти бараат најсовремени телефонски апарати, а на 9,6 проценти им се важни пониските цени на СМС/ММС и дата податоците. Минатата година 3,5 проценти од корисниците на мобилна телефонија го промениле операторот.