Во пожар во кој изгореа бараките на ЈП „Улици и патишта“ ноќеска е опожарено и возило во сопственост на обвинителот Гаврил Бубевски.
Станува збор за „шкода“ со скопски регистрации, која била паркирана на тротоарот, до бараките . Неговиот автомобил се запалил откако пожарот се проширил од другото возило, кое било паркирано зад неговото.
Министерството за внатрешни работи информира дека пријавата за пожарот во кој изгоре бараката на ЈП „Улици и патишта“ ја добиле околу 01.15 часот. Според полициската верзија на улицата „Стефан Јакимов Дедов“ настанал пожар во патничко возило „нисан“, со скопски регистарски ознаки, сопственост на Н.Л.(38) од Скопје.
– Од пожарот делумно било зафатено и патничко возило „шкода“, со скопски регистарски ознаки, сопственост на Г.Б.(45) од Скопје и бараките на ЈП „Улици и патишта“ кои биле целосно опожарени, информира МВР.
Од екипа на Бригадата за противпожарна заштита – Скопје пожарот бил локализиран, а повредени лица нема.