Во Собранието на Република Македонија, денеска ќе биде доделена државната награда „Мајка Тереза“ за 2017 година за особено значајни остварувања во областа на хуманоста и човечката солидарност и за поттикнување, унапредување на меѓусебното разбирање и развој на соработката, како меѓу народите, така и меѓу припадниците на различните заедници, култури и вери.
Годинашни добитници на државната награда „Мајка Тереза“ за 2017 се Миливоје Јанковски и доц. д-р Венера Крлиу-Ханџиски.
Инаку, од денеска до 5 септември граѓанската асоцијација „Скопјанката Мајка Тереза“ ја организира Манифестацијата „Денови на св. Мајка Тереза“.
Во рамки на манифестацијата денеска ќе биде положено цвеќе пред Спомен-плочата на местото на родната куќа на Мајка Тереза и ќе биде посетена нејзината спомен-соба во Феудалната кула.
Ќе се одржи и ликовна изложба од сликарите Живко Поповски-Цветин, Розе Мојсовска и децата со аутизам од Здружението „Во мојот свет“-Скопје, промоција на музички спот „Еден свет за сите“ од браќата Тавитијан и литературно читање на тема „Големото срце на Мајка Тереза“ со ученици од ОУ „Климент Охридски“ од Бутел.
За време на манифестацијата ќе биде одржана и крводарителска акција, света миса во Католичката црква во Скопје, како и доделување посланија за хуманост и статуетски со ликот на св. Мајка Тереза на хумани граѓани и здруженија.