Владата денеска, според барањата од вчерашната координација во Собранието, достави до Собранието дополнување на Информацијата за содржината на Предлог – преговарачката рамка за пристапните преговори на Република Северна Македонија со Европската Унија, предложена од страна на Претседателството на Франција, на 30 јуни 2022 година.
Документите се доставени до сите пратеници, информира Кабинетот, на претседателот на Собранието Талат Џафери.
Координаторот на пратеничката група на ВМРО ДПМНЕ, Никола Мицевски денеска изјави дека вчера вицепремиерот за европски прашања Маричиќ на координација им ветил дека ќе побара од МНР да достават дополнително материјали.
„За жал немаме никакви дополнителни материјали. Очигледно сме на различни фреквенции со СДСМ. Нашите интервенции се во преговарачката рамка и забелешките што ги имаме за одредени членови, додека Социјалдемократскиот сојуз очигледно само купува време и бара форма да достави некои заклучоци кои не се обврзувачки за Владата за да разговараме за истите, рече Секој чест на трудот на колегата Трајанов да направи нешто за да се дојде до некаков вид на разговор, меѓутоа очигледно е дека Владата како што ги водеше преговорите во тајност, така сака и да ја заврши целава оваа постапка со единствена разлика што немаше храброст да ја донесе оваа одлука во Владата туку ја префрла во Собрание кое што нема никаква обврска да одлучува за меѓувладина конференција посебно имајќи во предвид дека ги нема сите материјали на располагање, изјави претпладнето Мицевски.
Седницата за францускиот предлог на преговарачката рамка со ЕУ сеуште не е закажана.