Научниците за прв пат пронајдоа ситна пластика во свежо паднатиот снег на Антарктикот. Истражувачите од Нов Зеланд собраа примероци од 19 локации на Антарктикот и секое содржеше ситни пластични фрагменти.

Ситните честици пластика произлегуваат од ерозијата на пластичните материјали и се помали од зрно ориз и најчесто се невидливи со голо око.

Истражувачите откриле во просек 29 честички пластика на литар стопен снег. Пластиката е од 13 различни видови, а најчест е полиетилен терефталат (ПЕТ), кој најмногу се користи во шишиња за безалкохолни пијалоци и облека. Ова е откриено во 79 отсто од примероците.

Претходните студии открија микропластично загадување во морскиот мраз и површинските води на Антарктикот, но ова е прв пријавен случај да ги има и во свеж снег. Во 2020 година, истражувачите пронајдоа микропластика во близина на врвот на Монт Еверест. Тие се пронајдени и во длабоките океани.

Оваа форма на загадување може да има и локални и пошироки ефекти. „Микропластиката може да има штетни материи залепени на нивните површини како тешки метали, алги“, вели Лаура Ревел, вонреден професор на Универзитетот Кантербери, која исто така била вклучена во истражувањето.

Експертите исто така велат дека луѓето вдишуваат и внесуваат микропластика преку воздух, вода и храна.

Не се направени многу истражувања за нивното влијание врз човековото здравје, но една студија на Медицинскиот факултет Хал Јорк и Универзитетот во Хал минатата година покажа дека високите нивоа на проголтана пластика во човечкото тело имаат потенцијал да предизвикаат штетни ефекти, вклучувајќи и алергиски реакции.

Микропластиката, исто така, може да го зголеми влијанието на глобалното затоплување. Снежните полиња, ледените карпи и глечерите ширум светот веќе брзо се топат, а научниците велат дека микропластиката со темна боја може да ги влоши работите со апсорпција на сончевата светлина и зголемување на загревањето.

Чистите снежни облоги, ледените полиња и глечерите можат да рефлектираат голем дел од сончевата светлина, но други загадувачки честички како што е црниот јаглерод, исто така, се пронајдени на ледените полиња и глечерите на Хималаите – а научниците велат дека тие го забрзуваат топењето таму.

Глечерите кои брзо се топат на планинските масиви во различни делови на светот се повеќе стануваат опасност, што доведува до лизгање на земјиштето и лавини и предизвикувајќи глацијални езера да се излеваат од коритата.

Брзото разредување и повлекување на глечерите, исто така, претставува закана за снабдувањето со вода и земјоделството во планинските региони ширум светот. (Би-Би-Си)