Министерот за внатрешни работи Оливер Спасовски денеска во Трст, Италија, оствари работна средба со неговиот италијански колега, Марко Минити.
Спасовски и Минити на средбата ја потенцирале одличната соработка меѓу двете министерства, која се одвива во духот на традиционално добрите пријателски односи меѓу двете земји. Како особено значајна е соработката во областа на борбата против дрога, при што претставници од Министерството за внатрешни работи присуствуваат на обуки за борба против дрога, главно во Централната дирекција за борба против дрога во Рим, Италија.
Двајцата соговорници искажале подготвеност и за продлабочување на соработката, особено во областа на организираниот криминал и финансиските истраги. Министерот Минити ја потенцирал безрезервната поддршка од Италија за реформите во Македонија.
Министерот Спасовски вчера и денеска учествува на Завршната министерската конференција за проектот Борба против организираниот криминал: Меѓународна соработка во кривичното право во Трст, Италија.